INPUT é un espazo de titorización e asesoramento de proxectos cinematográficos en desenvolvemento que xorde da colaboración entre a Fundación Luis Seoane e o (S8) Mostra Internacional de Cine Periférico, a través da que 3 autoras terán acceso a 3 profesionais de prestixio internacional no campo do cine e da arte, con quen poderán discutir sobre os seus proxectos, dende o estado de escritura e desenvolvemento ata a distribución.
Coordinación INPUT: Gonzalo Veloso.
Pamela Biénzobas
Consultora, crítica e xornalista de cine chileno-francesa. Ademais das dúas décadas que leva escribindo sobre cine, colaborando con revistas e libros de diferentes países, traballou avaliando e asesorando proxectos, e tamén propondo candidatos a fondos e programas internacionais como Abycine Lanza, Torino Film Lab, Rawi (Xordania) ou Bellagio Center. (Fundación Rockefeller), entre outros. Traballa en festivais como os de Róterdam, Xixón ou a Berlinale Forum.
María Morata
Comisaria e investigadora. Levou a cabo proxectos artísticos e programas audiovisuais para diferentes museos, festivais e institucións artísticas (Arsenal-Institut para Cine e Videoart de Berlín, CCCB, MACBA e Centre Arts Santa Mònica Barcelona, Sterischer Herbst Graz, Impakt Festival Utrecht, Intermediae Matadero e La Casa Encendida, entre outros). Membro do comité de selección de Berlinale Shorts do Festival Internacional de Berlín, Dok Leipzig e Kasseler DokFest.
María Palacios Cruz
María Palacios Cruz é responsable da especialidade de comisariado de Elias Querejeta Zine Eskola (Donostia), subdirectora adxunta de LUX (Londres) e cofundadora da editorial The Visible Press. É ademais programadora para os festivais Punto de Vista (Pamplona) e Courtisane en Bélxica. Acaba de editar unha antoloxía dos escritos de Lis Rhodes titulada Telling Invents Told (2019).
CRÍAS, de Xiana do Teixeiro
Película-revelación, que saca á luz o obxecto oculto do diario secreto de adolescencia feminina. No filme desprégase un autoinforme fragmentado que cuestiona todas as outras narracións sobre a experiencia da mocidade feminina. A vida das mulleres é debuxada como un proceso de discontinuidades, algo que, para avanzar, debe negarse. Crías é un libro filmado, un arquivo, un manifesto e un segredo.
Xiana do Teixeiro (de Walkie Talkie Films) é cineasta e investigadora. Traballa dende o ecofeminismo en proxectos sobre a construción e o significado social do xénero e da narrativa espectrista antropocena. É a autora de Tódalas mulleres que coñezo (2018), Somos Plaga (2017) e Carretera de una sola dirección (2016), entre outros proxectos.
BOMBARDEAR LAS NUBES, de María Isabel Costa Alfaro
Curtametraxe/cine expandido. Bombardear nubes supón, nun principio, o acto de desnaturalizar un elemento. A partir desta premisa, o proxecto aborda dous conceptos de desnaturalización para crear entre eles unha analoxía poética na que o proceso de bombardear as nubes atopa a súa relación coa migración forzada que atravesa Venezuela actualmente.
María Isabel Costa Alfaro es Licenciada en Comunicación Social, mención Artes Audiovisuais (Caracas, Venezuela). Dende o 2017 reside en España onde afondou nos seus estudos dentro do campo do cine documental e de vangarda.
EL MÉDICO CURA, de Maider Fernández Iriarte
El médico cura é un díptico audiovisual que explora a relación que se dá entre o relixioso e o científico, entre o físico e o sagrado no Santuario de Lourdes. Como pode reforzar a ciencia a crenza nos milagres?
Maider Fernández Iriarte (Donostia, 1988) é artista e cineasta. Os seus traballos foron recoñecidos e expostos en numerosos festivais e centros de arte, como o Festival de San Sebastián, Festival Europeo de Sevilla, FICXixón, Festival de Málaga, Zinebi, DA2, IVAM ou L’Alternativa, varios deles como parte do colectivo Las chicas de Pasaik. Actualmente está finalizando a súa primeira longametraxe, Las letras de Jordi, gañadora do premio Ikusmira Berriak 2017 do Festival de San Sebastián.
