O Teatro Colón da Coruña acolleu onte á noite a inauguración do (S8) 9ª Mostra Internacional de Cinema Periférico, que se estenderá ata o próximo 3 de xuño de 2018.
A paixón de Xoana de Arco, de Carl Theodor Dreyer, é unha das obras mestras máis indiscutibles da historia do cinema e durante a inauguración do (S8) 9o Mostra Internacional de Cinema Periférico, que tivo lugar onte á noite no Teatro Colón da Coruña, cativou ao público grazas á ópera/oratorio de Richard Einhorn, Voices of Light/ A paixón de Xoana de Arco, e á precisa dirección de Fernando Briones orquestrando a poderosa interpretación do Coro e Orquestra Gaos.
De novo con Quico Cadaval como mestre de cerimonias, a gala de inauguración do (S8) 9a Mostra Internacional de Cinema Periférico contou coa presenza de Goretti Sanmartín, Vicepresidenta da Deputación Provincial da Coruña, José Manuel Sande, Concelleiro de Cultura do Concello da Coruña, Alberto Lema, Concelleiro de Turismo do Concello da Coruña, Lanzada Calatayud, xerente de Turismo do Concello da Coruña, Guillermo Escrigas, director do CGAI e en representación de AGADIC – Xunta de Galicia, e Silvia Longueira, directora da Fundación Luís Seoane, entre outros, nunha velada sobrecolledora e alquímica, a través da suma dos fermosos e emocionantes primeiros planos do filme de Carl Theodor Dreyer co misticismo lírico da partitura de Richard Einhorn.
A gala Voices of Light/ A paixón de Xoana de Arco supón o arranque de dez días do mellor cinema de vangarda internacional. Philip Hoffman, Frield vom Gröller, Pablo Mazzolo, Scott Stark, Chris Kennedy e María Ruido visitarán o (S8) para presentar a súa obra artística. Cinema conferencias, filme performances, proxeccións dos autores invitados, talleres e encontros profesionais completan o nutrido programa da novena edición dunha Mostra que converterá A Coruña un ano máis no epicentro da creación artística.
